Жас ғалымдарға 20 млн теңге табысталды
Жас ғалымдарға 20 млн теңге грант табысталды. Қорқыт ата атындағы Қызылорда университеті жыл сайын ғылыми ізденісі мол жастарға қолдауды күшейтіп келеді. Атқарылған жұмыстарды баяндап, оқытушылар мен студенттер алдында есеп берген университет ректоры жаңа жоспарларымен бөлісті. Кездесу барысында академиялық білім беру, ғылыми-зерттеу, халықаралық қатынас, әлеуметтік қызмет және цифрландыру бағыттары бойынша оқу орнында атқарылған жұмыстар баяндалды. Университет әлемдік рейтингте 1400 оқу орнының қатарына енсе, Орталық Азиядағы университеттер арасында 34 орында. Университетте 40 жасқа дейінгі ғалымдарға арнайы грант бөлінгеніне биыл төртінші жыл. Бұл қаржыға ғалымдар ғылыми-зерттеу жұмыстарын жүргізу мен инновациялық жобаларын дамытады. Осыған дейін 33 жобаға жалпы көлемі 50 млн теңге қаржылай қолдау көрсетілген. Биыл да 15 жоба жеңімпаз атанды. Бүгінде оқу ордасында 10 мыңнан астам студент білім алса, оның 50 пайызға жуығы мемлекеттік білім гранты бойынша оқиды. Биыл алғаш рет еліміздің өзге облыстарынан 150-ден астам студент қабылданды. Сонымен қатар, Қытай, Моңғолия, Өзбекстан және Ресейден келген 46 шетелдік студент білімін жетілдіруде. Шетелдік қандастарға 19 білім гранты табысталған. Солардың бірі – Ақжол Оразәлі. Университеттің шетелдік оқу орындарымен әріптестік байланысы артқан. Мәселен Ташкент ирригация және ауыл шаруашылығын механикаландыру инженерлері институтымен 6 бірлескен білім беру бағдарламасы әзірленіпті. Ал қос диплом бағдарламасы бойынша Мәскеу авиация институтының «Восход» филиалы және Жүсіп Баласағұн атындағы Қырғыз ұлттық университетімен бірлескен 2 білім беру бағдарламасы жүзеге асырылуда. Сондай-ақ шетелдік оқытушыларды шақырып, студенттерге шет тілдерін меңгертуге мән берген. Университет ректоры алдағы уақытта еліміздің адами капиталы мен ғылыми-технологиялық әлеуетін күшейтуге ықпал ететін жаңа бастамаларды жүзеге асыратынын айтты. Кездесу соңында зиялы қауым өкілдері мен профессор-оқытушылар өз сауалдарын қойып, ұсыныс-пікірлерін білдірді. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
