Рәміздерге құрмет - мызғымас міндет

Мемлекеттік рәміздер күніне орай Жалағаш ауданында мерекелік шара болды. Бұл күні жалағаштық жастар бейбіт шеру ұйымдастырып, көк туды мақтанышпен көтеріп, аудан орталығымен жүріп өтті. Егемен елдің айбарына айналған рәміздерге құрмет шарасы турасында тілшіміз сабақтайды. Тәуелсіз Қазақстанның мемлекеттік рәміздері осыдан 32 жыл бұрын, 4 маусым күні бекітілді. Міне, содан бері аталмыш күнді барша қазақстандықтар айтулы мереке ретінде атап өтіп келеді. Егемен елдің айбарына айналған рәміздерге құрмет азаматтық борыш. Мұны жалағаштықтар жақсы түсінеді. Сондықтан жұртшылық таңмен таласа бір ортадан табылып, бейбіт шеру ұйымдастырды. Көпшілік аудан көшелерімен жүріп өткен соң орталық алаңға ойысты. Мерекелік жиында мемлекеттік рәміздердің құндылығы дәріптеліп, еңбек ардагерлері мен аудан басшылығы бұл елдігімізді нығайта түсетін мерейлі мереке екеніне тоқталды. Рәміздеріміздің құныдылығы айтылған жиында өңір өркендеуі жолында сүбелі үлес қосып жүрген түрлі сала мамандары марапатталды. Тәуелсiздiкке тағзым ең алдымен осы мемлекеттiк рәмiздерге құрмет көрсетуден басталады. Тұтас ел ұлттық бағдарды шамалап, рәміздерді жүрегімен даралаған кезде ғана елдіктің темірқазығы берік болары анық. Жергілікті өнерпаздардың концерттік бағдарламасы мерекелік шараның мазмұнын байыта түсті. ЕЛЖАС ӘБДІЛДА – ТІЛШІ /Көк аспанда желбіреген байрағымыз еңсесі биік елдің егемендігін айғақтайды. Ал, әнұран көкейден шығып, көмейге қонған құр әуен емес. Бұл мың өліп, мың тірілген қазақ жұртының жүрек үні. Ендеше осынау құндылықты құнттау баршаға ортақ! Бұл бір күнмен шектелмесе керек!/ Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/