САХНА САҢЛАҒЫ - СӘБИРА
Биыл Қазақстанның Халық әртісі, Мемлекеттік сыйлықтың иегері, «театрдың анасы» атанған талантты тұлға Сәбира Майқанованың туғанынан 110 жыл. Осыған орай облыс орталығында «Театр.Өмір.Сахна» атты еске алу кеші өтті. Республика күні аясында ұйымдастырылған шараға Сәбира Майқанованың қызы Гүлдар Әбдірашитова арнайы келіп қатысты. Шыңғыс Айтматовтың «Ана-Жер-Ана» қойылымындағы Толғанай рөлі Сәбира Майқанованың шығармашылық шыңы десек болады. Себебі, Сырдың талантты тумасы осы бейнені сомдау арқылы Мемлекеттік сыйлықтың иегері атанды. 1932 жылы театр табал¬дырығын аттап, 65 жыл бойы киелі сахнада өнер көрсеткен әйгілі актриса қоғамдағы әйел-аналардың бейнесін шынайы әрі шеберлікпен сомдады. Тіпті, грузин, вьетнам, эстон, испан, фин, түрік, өзбек, орыс, қырғыз әйелдерінің де рөлін ойнап, көрермен көзайымына айналды. Иә, Сәбира Майқанова әлемдік деңгейдегі актриса. Сахна саңлағы 1936 және 1958 жылдары Мәскеуде өткен қазақ өнері мен әдебиетінің он-күндігіне, Мұхтар Әуезов театры труппасының құрамында бір¬неше халықаралық театр фестивальдеріне қатысып, қазақ өнерін дүниежүзіне танытқан. Міне, осындай талантты тұлғаны еске алу кешіне қатысқан қала әкімінің орынбасары Дархан Тұрсынбаев Майқанованың есімі мәңгілік ел есінде қалатынын айтты. Мерекелік кеште Сәбира Майқанованың қызы, медицина ғылымдарының докторы Гүлдар Әбдірашитова мен Қазақ ССР-нің еңбек сіңірген әртісі, профессор Рахилям Машуроваға құрмет көрсетілді. Сырдың Сәбирасы театрда ғана емес қазақ кино өнерінде де өзіндік қолтаңбасын қалдырған тарлан талант иесі. «Махаббат туралы поэмадағы» Мақпал, «Қыз Жібектегі» Қамқа, «Шабандоз қыздағы» Гүлбаршаның рөлі көрерменнің оң бағасына ие болған. Еске алу кешінде жергілікті өнерпаздар Оңталап Нұрмахановтың сөзіне жазылған белгілі композитор Сәбит Ұлықпанның «Сәбира апа» әнін орындап, сағыныш сезімін тербетті. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
