Diskour Dr Patrick Herminie kot Konferans Lazenes 2025

Ler i ti pe adres sa plis ki mil zenn, i ti vin partisip dan sa konferans lazenes United Seychelles, Dr. Herminie ti dir ki "Ozordi mon debout devan zot, a en moman desisif dan listwar nou Nasyon kot nou nepli annan dwa angaz dan retorik politik, me plito adres bann problenm e defi ki zot lazenes e nou nasyon pe fer fas avek. Se en moman, kot malgre tou bann defi, nou bezwen kit lespwar vivan. Ler mon get dan sa lasal mon vwar lenerzi, lantousiasm e potansyel imans." I ti azoute ki Le 27 Septanm sa lannen, se zot, lazenes Seselwa, ki pou zwe pli gran rol pou definir ki kalite lavenir zot le pou zot menm e pou zot pei. An dot mo, se zot larsitek zot fitir. Dan mon enteraksyon ek zot pandan sa kat dernyen lannen, mon vwar zot lentelizans e osi byen ki zot dezir pou vwar en meyer lavi pou zot menm, zot paran, frer ek ser. Mon vwar ki zot le travay pou devlop zot pei, zot bann vre patriot, bann Seselwa fyer e resilyan, bann net imen ki rezet prezidis, e rezet nosyon ki zot bann sitwayen dezienm klas dan zot prop pei."