А.ОСПАНОВ АТЫНДАҒЫ МУЗЕЙ АШЫЛДЫ

Қызылорда медициналық жоғары қолледжінде Денсаулық сақтау ісінің үздігі, ұлағатты ұстаз Аманжол Оспанов атындағы музей ашылды. 1965 жылы Алматы қаласындағы медицина институтын бітірген Аманжол Оспанов еңбек жолын Қызылордадағы №1-ші қалалық дәріханада провизор болып бастады. Кейін медициналық колледжде фармация пәнінің оқытушысы болып жұмысқа орналасып, маман даярлау ісінде 45 жылдай табанды еңбек етті. Осы уақыт аралығында студенттердің кәсіби даярлығы мен ғылыми-теориялық біліміне ерекше назар аударды. Музейдің ашылу салтанатында сөз алғандар «Ұстаздың жас мамандарды тәрбиелеудегі талапшылдығы талай биікті бағындыруға сеп болды,» дейді. Аманжол Әбжаппарұлы медицина саласындағы тың теорияларды негізге ала отырып, «Жиған-терген» атты кітабын жарыққа шығарған. Іргелі оқу ошағында ашылған мұражайда сол оқу құралының ішінде жазылған құнды деректер топтастырылып, қойылды. Ұлағатты ұстаз бос уақытында еркін күреспен шұғылданған. Соның нәтижесінде, 1965-85 жылдары Аманжол Оспановтың тәлімгерлігімен 200-ден астам КСРО спорт шебері шыққан. Еске алу шарасы еркін күрестен жасөспірімдер арасындағы облыстық ашық турнирмен жалғасты. Барлық ауданнан 10 команда, 70-ке жуық спортшы қатысып, арнайы жүлдені сарапқа салды. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/