Жыл үздіктері марапатталды
Ұлу жылы Сыр өңірі үшін табысты түйінделді. Сан саланың бойынша қан жүгіріп, ұлы істерге ұласты. Бүгін аймақ басшысының қатысуымен жыл бедерінде атқарылған жұмыстар қорытындыланып, еңбекте озат атанған азаматтар марапат төрінен көрінді. Өтіп бара жатқан 2024 жыл өңірге біраз өзгеріс әкелді. Қызылорда - құрылысы қуатты, эконономикасы тұрақты аймақ атанды. Талай іргелі істердің түндігі түрілді. Білім мен денсаулық сақтау саласы соны серпін алды. Ал, шаруалар ширақ қимылдап, аймақ қамбасын дәнге толтырды. Тайқазан қаржысы еселеп артып, елдік іске екпін берілді. Жуырда еліміздің әлеуметтік-экономикалық және мәдени дамуына елеулі үлес қосқан бір топ азамат мемлекеттік наградалармен марапатталды. Физика-математика ғылымдарының докторы, Ұлттық ғылым академиясының вице-президенті, жерлесіміз Асқар Жұмаділдаевқа «Қазақстанның Еңбек Ері» атағы табысталған еді. Облыс әкімі мерейлі мезетті аймақ жұртының арда азаматқа автокөлік кілтін табыстады. Мерейлі мезетте аймақ дамуына айрықша үлес қосқан бірқатар азаматқа «Парасат» және «Құрмет» ордені табысталды. Сондай-ақ, атыз аралап, егіс жағалаған қарапайым еңбек адамдары «Ерен еңбегі үшін» медалін кеудесіне тақты. Солардың бірі - диқан Жұмабек Бүрісов. Ол ширек ғасырдан бері егін саласында еңбек етіп келеді. Жыл жабар тұста Сыр журналистері де құрмет төрінен көрінді. «Қызылорда» телеарнасының шеф-редакторы Мөлдір Құлмырзаева, «Қазақстан» ұлттық арнасының меншікті тілшісі Әділбек Серікұлы сынды майталман мамандарға облыс әкімінің «Жебе» сыйлығы табысталды. Алғаш рет ұйымдастырылған байқау жеңімпаздары 1 миллион теңге қаржылай сыйақыға ие болды. Бұдан бөлек, Қызылорда облысының қанат жайып, кең өріс алуына ерекше еңбек сіңірген сала үздіктері марапатталды. Төтенше жағдай мен ішкі істер органдарында, сондай-ақ, білім мен денсаулық сақтау саласында озат атанған азаматтар жыл соңында ел алғысын иеленді. Осылайша, жыл түйінделер тұста еңбек озаттарының еңбегі еленіп, тағы бір жыл тарих қойнауына кетіп барады. Мерекелік кеште «Қызылорда - Сыр елі» әнінің тұсауы кесіліп, сырбойылық өнерпаздар концерттік бағдарламасын ұсынды. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylorda_tv Tiktok -https://www.tiktok.com/@qyzylorda_tv/
