КҮКІРТ ЗАУЫТЫНЫҢ ҚОРШАҒАН ОРТАҒА ӘСЕРІ БАҚЫЛАУДА
Аймақтағы ірі өндіріс орындарының экономикалық тұрғыда тиімділігі жоғары болғанымен экологиялық жағынан қоршаған ортаға тигізер зияны да аз емес. Ал оны бақылау осыған дейін едәуір қиындық тудырып келген еді. Енді мұндай кәсіпорындарда автоматты мониторингтік жүйе іске қосылды. Оның қандай ерекшелігі бар? Бұл сауалдың жауабын әріптесім Асқар Тәжиевтен білейік. АСҚАР ТӘЖИЕВ – ТІЛШІ Жаңақорған ауданындағы күкірт қышқылы зауытынан ауаға тарайтын зиянды заттардың мөлшері осыған дейін тоқсанына бір рет жүргізіліп отырған. Ал қазір автоматты мониторингтік жүйенің көмегімен зиянды заттардың мөлшері үздіксіз тәулік бойы жүргізіледі. Зауытта бұл жүйені қолданысқа енгізуге бір жылдай уақыт кеткен. Шағын ғана қорапшаға қойылған арнайы құрылғыға кез-келген адамның қолы жете бермейді. Жауапты мамандарға ғана міндеттелген. Ал үлкен құбырға орнатылған датчиктердің көмегімен ауаны ластайтын компоненттердің мөлшері деректер базасына әр 20 минут сайын түсіп отырады. Әрі бұл мемлекеттік және жеке ұйымдар жинақтаған әртүрлі салалардағы ақпаратты орталықтандырылған түрде сақтайтын және өңдейтін «Қоршаған орта мен табиғи ресурстардың жай-күйі туралы Ұлттық деректер банкінің» базасына тікелей жолданады. Мамандардың сөзінше электр жарығы сөніп немесе интернет желісінде кедергі болған уақытта да деректер ақпараттық жүйеге тіркеле береді. Жалпы бұл жүйе өнеркәсіптік нысандардың жұмысын нақты уақыт режимінде бақылауға, деректерді үздіксіз жинауға, талдауға және тиісті шаралар қабылдауға мүмкіндік береді. «Қоршаған ортаға эмиссиялар мониторингінің автоматтандырылған жүйесін енгізу жөніндегі жол картасы» салалық министрлікпен келісілген. Айта кетейік біздің өңірде бұл санаттағы үш кәсіпорын бар. Олар: «СКЗ-U» , «Гежуба Шиелі Цемент Компаниясы» және «Orda Glass LTD» ЖШСеріктестіктері. Барлығы да автоматтандырылған жүйені толығымен орнатқан. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
