Сұйытылған газ бағасы өндіру құнын ақтамай отыр
Елімізде сұйытылған газ бағасы қайта қаралуы мүмкін. Өйткені газ өндіруші қазақстандық компаниялар шығынға ұшырап отырмыз деп шағымдануда. «Нарықтағы газ құнының төмен болуы оны өндіруге және жабдықтарды жаңартуға жұмсайтын шығындарды өтемейді»,- дейді. Қазіргі уақытта сұйытылған газ өндіретін кәсіпорындар Энергетика министрлігімен сұйытылған газдың өндіріс құнын өтей алатындай баға белгілеу мәселесін талқылап жатыр. ҚР Энергетика министрлігі белгілеген баға өнімнің өзіндік құнын өтемейді дейді «Қазгермұнай» БК» ЖШС директорының орынбасары Махамбет Елеусінов. «Қазгермұнай» жылына 60 мың тоннаға жуық сұйытылған газ өндіреді. Кәсіпорын Ақшабұлақ, Нұралы, Ақсай кен орындарынан ілеспе мұнай газын және Оңтүстік Ақсай кенішінен шығатын табиғи газды өңдеп, облыс тұрғындарын сұйытылған газбен қамтамасыз етеді. Зауытқа қажетті жүйелі жөндеу жұмыстары жүргізілмегендіктен газ тапшылығы орын алуда. Мәселен өткен жылдың соңында 2-3 апта автогаз тапшылығы сезілді. Мұндай мәселе жабдықтарды жаңғыртуға уақтылы көңіл бөлінбеудің салдарынан дейді мамандар. Ал қайтарымы жоқ іске инвесторлар да иліге қоймайды. Сұйытылған газ өндіруге инвестиция салатын мүмкіндігі бар жер қойнауын пайдаланушылар бұл өндіріске қызығушылық танытпай отыр. Сұйытылған газды өндіруді жалғастырып жатқан кәсіпорындар мұны шикізат өндіретін өңірлер алдындағы әлеуметтік міндеттеме ретінде орындап отыр. Белгіленген шекті көтерме баға тоннасына ҚҚС-сыз 40 320 теңге болғанда, сұйытылған газды өндіру құны зауытқа байланысты тоннасына 50 000-72 000 теңгені құрайды. Бұл шекті бағаны белгілеу елдегі жанармай құю бекеттеріндегі бөлшек сауда бағасын төмен ұстауға мүмкіндік берген. Ал енді бағаның нақты қанша пайызға өсетіні әзірге белгісіз. Мамандар өгізді де өлтірмейтін, арбаны да сындырмайтын амалға барамыз деп отыр. Сайт - https://qyzylordatv.kz/ru/live Facebook - https://www.facebook.com/qyzylordatv/ VK - https://vk.com/qyzylordatv Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
