ТАЛАНТТАР ТОҒЫСҚАН КЕШ
#өнерлібалалар #өнерорталығы #жаңалықтар #нақтыақпарат #qyzylordatv Өңірде өскелең ұрпақтың талабын ұштап, қарым-қабілетін шыңдайтын қосымша білім беру ұйымдары жетерлік. Солардың бірі Қызылорда қаласында орналасқан «Айым» өнер орталығы. Биыл орталық оқушылары бірнеше халықаралық байқауда топ жарып, аймақ мерейін үстем етті. Осыған орай жыл жабар сәтте балаларға базарлық ретінде жаңа жылдық кеш ұйымдастырылып, талантты өрендер өнерлерін ортаға салды. Жас жеткіншектерге берілген жүйелі білім мен тәлімді тәрбие – ертеңге салынған ең қайтарымды инвестиция. Осы мақсатты мақұлдаған «Айым» өнер орталығы 2 жылдан бері талантты өрендердің талабын ұштап келеді. Бүгінде мұнда 700-ге жуық оқушы қарым-қабілетін шыңдауда. Ал оларға кіл кәсіби мамандар сабақ береді. Соның нәтижесінде биыл орталық оқушылары түрлі байқауларда топ жарып, жылды табысты қорытындылап отыр. АЛЬБИНА МІНАЖ – «АЙЫМ» ӨНЕР ОРТАЛЫҒЫ ҰЙЫМДАСТЫРУ БӨЛІМНІҢ ЖЕТЕКШІСІ Орталықтың жетістіктері өте көп. 2024 жылы да бізге өте жемісті болды. Себебі, облыста өнер орталықтары арасында алғаш болып жас жайдарманшылар Астана қаласына барып, республикалық ойындарға қатысп келді. Сондай-ақ, домбыра үйірмесінің оқушылары Ташкент қаласынан бас жүлдені иеленді. Біздің үйірмеде қаладағы ең үздік мамандар қызмет етеді. Сол мамандардың арқасында жемісті жұмыс жасап жатырмыз. Аталмыш өнер орталығында 11 үйірме жұмыс істейді. Жаңа жылдық салтанатты кеште сол әр топтың үздіктері өнер көрсетті. Мұнда мың бұралған бишілер де, әні әуезді әншілер де бар. Ең бастысы, ұлттық дәстүрді дәріптеп, домбыраны жанына серік еткен жастардың қатары қалың. Келелі кеште күмбір күй төгіліп, дәстүрлі ән шырқалды. ЗҮЛФИЯ ӨТЕГЕНОВА – ҚАЛА ТҰРҒЫНЫ Біздің Жаппасбай және Шанхай мөлтек ауданында осындай орталық ашылып, балаларға зор көмегін тигізуде. Әрі тегін, балаларға қолайлы. Баларымыз ән айтып, би билеп, домбыра үйреніп, жақсы жетістіктерге жетіп жатыр. Қаншама байқауларға қатысып, жақсы жетістіктер алуда. Біз осындай өнер мектебі болғанына өте қуаныштымыз. Бүгінде Сыр өңірінде 12 мыңға жуық оқушы ақысыз негіздегі өнер үйірмелеріне барады. Бұл әсіресе көп балалы жанұяларға тиімді. Жаңа жылдық салтанатты кеште ата-аналар балаларының аз уақытта үйренген өнеріне тәнті болып, риясыз марқайды. Ал, кеш соңында оқушылар ертегілер еліне саяхат жасап, тамаша қойылымның куәсі болды. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
