ТАРИХЫ ТЕРЕҢ БІЛІМ ОШАҒЫ
Облыс орталығында орналасқан Сәкен Сейфуллин атындағы №4 ақпараттық технология мектеп-лицейінің құрылғанына – 60 жыл. Іргелі білім ошағының мерейтойына орай жаңа жинақтың тұсауы кесіліп, мектеп қабырғасынан музей залы ашылды. Онда өткеннің өнегесінен сыр шертетін құнды жәдігерлер жинақталған. Тарихы терең білім ошағы турасында тілші бейнематериалы. Білім ошағының маңы азан-қазан. Есіктен енгеннен мерейтойдың нышаны бірден байқалады. Алтын ұя мектептен қанат қаққан әр жылғы түлектер қауқылдаса қауышып, бала күнгі естеліктерімен бөлісті. Жалпы, Сәкен Сейфуллин атындағы №4 орта мектеп 1964 жылдың қыркүйек айында ашылған. Содан бері 5 мыңға жуық жас осында білім нәріне сусындап, үлкен өмірге қадам басты. Жиында сол өткеннің өнегесінен сыр шертетін арнайы жинақтың тұсауы кесіліп, ұстаздар қауымының еңбегі дәріптелді. Мерейлі мезетке орай мектеп қабырғасынан музей залы ашылды. Онда ең алғаш ұстаздар керуенін бастаған Қасымбек Ыбыраев, Сәдуақас Қилыбаев және Жүсіпәлі Ахметов секілді білікті мамандардың мұралары қойылған. Сондай-ақ, түрлі салада жемісті еңбек етіп келе жатқан мектеп мақтаныштары туралы арнайы бұрыш жасақталыпты. Бұл білім ошағынан зерделі ғалым да, ерекше дарын да түлеп ұшқан. Алпыс жылдық айтулы сәтке солардың дені арнайы келіп, әріп таныған алтын ұяға құрмет көрсетті. Іргелі оқу ошағында басталған тағылымды шара студенттер сарайында салтанатты кешке ұласты. Айта кетерлігі, осыдан 5 жыл бұрын бұл білім ұясына «Ақпараттық технология мектеп-лицейі» статусы берілген болатын. Көп ұзамай материалдық-техникалық базасы жаңғыртылып, көне мектептің көкжиегі кеңейді. Бүгінге дейін осында оқыған 50-ге жуық оқушы алтын белгі иеленіп, білім биігінен көрінген. Әрине, бұл ұлағатты ұстаздар еңбегінің жемісі. Сондықтан педагогикалық кәсібилігін байқатып, үздік нәтиже көрсеткен сала мамандарына құрмет көрсетілді. 60 жылдық мерейтой қарсаңында аймақ басшысының қолдауымен мектеп жанынан 300 орындық оқу корпусы ашылды. Сондай-ақ, тағылымды түлектер де алтын ұя мектепке сый-құрмет көрсетіп жатыр. Салтанатты кеш концерттік бағдарламаға ұласып, осы білім ұясынан қанат қаққан өнерпаздар ән шырқады. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
