Қызылжарда жаңа мешіт бой көтерді
Арал ауданындағы Райым ауылдық округіне қарасты Қызылжар елді мекенінде Оңғар ахун Тұрымбетұлының 180 жылдығы аталып өтті. Айтулы күні жаңадан бой көтерген мешіт жамағатқа есік ашты, ұлттық спорт түрлерінен сайыс ұйымдастырылды. Әріптесім Дәулет Сағиттың бейнематериалында толығырақ. Ислам дінінің өркендеуіне үлес қосып, ағартушылықтың ізгі амалдарын ұстанған Оңғар Тұрымбетұлы 1844 жылы Арал ауданы, Қызылжар елді мекенінде дүниеге келген. 14 жасында Хиуадағы қожайын Пахуаддиннің мешітінде жүріп, Кәмәл мағзум мен Абдул Мұхаммед қаридан дәріс алды. Осылайша, медреседе 7 жылға жуық білім жиған ол ахун лауазымын иеленіп, шипагерлік қасиетімен ел арасында әулие атанады. Ауыл ақсақалдарының айтуынша, сырқаттанып келгендерді емдеп, дертінен айықтыратын қасиетке ие болған. Бұл елді мекенде ең алғашқы мешіт 1994 жылы ауыл азаматтарының асарлатуымен салынған. Содан бері 30 жыл уақыт өтті. Ауылдың еңсесі тіктеліп, халық саны өскендіктен имандылық үйі талапқа сай келмеді. Сондықтан да болса керек, тұрғындар қуанышында шек жоқ. Айта кету керек, бұл орында көпшілік құлшылық жасаумен қатар діни білімін жетілдіре алады. Ол үшін білікті мамандар бекітілген. Айтулы іс-шарада ауыл азаматтары командаға бөлініп, ұлттық спорт түрлерінен сайысқа түсті. Білектілер бәсекесінде мықтылар арқан тартысып, гір тасын көтерді. Жеңімпаз атанғандар алғыс хат және бағалы сыйлықтармен марапатталды. Ал, ауыл сыртындағы ат бәйгесі көпшіліктің делебесін қоздырды. Тай жарысында таласқа түскен 13 шабандоз бес шақырымды бағындырса, тоқ бәйгеде тұлпарлар 15 шақырымдық қашықтықта жүйрікті анықтады. Көпшілік асыға күткен аламан бәйгеде аттың бабымен қатар шабандоздың да әдіс-айласы, атсейістердің пайдалы кеңесі ерекше рөл атқарды. Соңғы айналымда қарсыластарынан қара үзіп, дара шыққан қазалылық «Арғымақ» жеңімпаз атанды. Мұнан кейін, кешқұрым аудан өнерпаздарының қатысуымен ауыл орталығында гала концерт өтті. Бірлігі бекем елдің көзайым көрінісі осылайша түйінделді. Сайт - https://qyzylordatv.kz/ru/live Facebook - https://www.facebook.com/qyzylordatv/ Instagram - https://www.instagram.com/qyzylordatv/ Telegram - https://t.me/qyzylords_tv Tiktok -https://www.tiktok.com/@qyzylorda_tv/
